ملنيل ع الآخر

نص المجموعة:
الزهق بيخوفني وبيحسسني بقلة الحيلة، والفراغ من الأحلام بيخلق الكسل، سيطرة الماضي بتقتل تركيزي، مهو أصل الروتين لونه رمادي، فقررت اخرج برا الكومفرت زون والموضوع كان موتر.
ضريبة الروتين قرارات غلط، ومع الوقت بيسيطر عليا ويخليني في خنقة، التعود زنان، ووقت الليل عشوائي وطويل جدًا.. بيحسسني بغضب شديد.
التعود مرقعة مخيفة، سيكبة السيستم بتجيبلي ضيق تنفس، وبما إن معيار الهروب هو الأكل بالليل، محتار هطلب إيه!
الإختيار صعب، علبة ناجتس ولا بطاطس!
ليه الملل بيزهق مع إنه في السمبلة منه مجرد أكل ونوم!
غيرت رأيي وقررت ارجع للكومفرت زون والطريق كام محتاج صبر وافكر في الأحلام من غير قلة تركيز، بس الأحلام مؤسسة كبيرة مسيكبة.
أنا مزنوق ومحتار والتعود قلة حيلة والروتين بيرجعني لنقطة الصفر. الملل فراغ زنان بيطفش النوم ويزود الحيرة، مفيش قدامي غير اللامبالاة وإني أرجع أنام تاني.. مهي كدا كدا خربانة.

إسلام:
مش عارف أنا حبيت الملل من كتر مبيجيلي ولا حبيت الدخان عشان بشربه وقت مكون زهقان، بس في النهاية الدخان بيزهق ويخلص والملل لسه مزهقش مني.

آلاء:
بهرب من الملل دائما سواء بوعي أو بدون، من غير ماحس بلاقي نفسي دائما بعمل حاجة، اي حاجة ايا كانت سواء مفيدة أو غير مفيدة، المهم انشغل مقعدش فاضية.
انا اصلا فنانة بحب اعمل كل واي حاجة بإيدي، واحب اوي اجمع الحاجات المختلفة اللي بتساعدني أخلق اي شئ، بفضل طول ايامي يا اجمع يا أخلق شئ، مبعقدش فاضية ابدًا.
المهم بقالي فترة كده، كل ماجي اعقد اعمل حاجة معرفش! جمعت حاجات كتير اوي ومش عارفة ابدأ منين، وفجأة بقيت قاعدة فاضية طول الوقت.

سارة:
صديقي الجميل اللي لازق في يومي بغراء، سامحني كل شوية أصدعك وألففك معايا من هنا لهنا.
أنت عارف لما الزهق بيحبُك مبلاقيش قدامي غيرك لحد ما ربنا يفرجها بحاجة تكسر الروتين، كان بودي لو أريحك من زيارتي ولو يوم.. و لكن مقداميش غيرك طريق اهرب بيه من التفكير واقتل الوقت بقلب ميت و ضمير نايم!
صديقي اللي عمره ما اشتكى، هي صفقة ما بيننا كل ما الخنقة تخنقنا اجيلك فنخنقها و كان الله بالسر عليم!

سما:
أنا شخص بيزهق بسرعة جدًا فبحب التنوع والتغيير دايمًا وعشان كدا هتلاقيني بجرب دايمًا ومش بحب أحط حدود للتجارب. بحب الحاجات بتاعتي تعبر عني و تبقي برا الكومفرت زون. حاجاتي الشخصية بعتبر عني وعن قراراتي العشوائية ممكن تحس إني متوترة بسبب اختياراتي الغير مفهومة بس دا مش حقيقي. اختياراتي كلها غير روتينية وبتعبر عني وعن أحلامي اللي بلا حدود وعن مغامراتي اللامتناهية.

داليا:
الملل بالنسبة لي وقت مبيعديش، وبما ان الملل مرعب جدًا من وجهة نظري، فبالتالي الوقت كمان مرعب؛ بخاف يجري بسرعة أوقات، وأوقات تانية ببقى نفسي يعدي ومش لاقيه طريقة اخليه يعدي بيها. مزنوقة دايمًا بين الانتظار والهروب.

محمد:
بنزل من البيت ٨ ص ادخل فى زحمة ٦ أكتوبر بعد كده على الشغل، وقت الوضوء برتاح شوية، بعد كده بكمل شغل لحد ما الليل بيجى واقابل الشباب، كله ملل في ملل لحد ما ارجع البيت واتساب فى حالى.

محمود:
دايمًا نفسي أسأله سؤال.. إنت مبتزهقش؟!
ليه دايمًا بتساعد حد تاني؟
طب إنت مين بيديك نفس الطاقة؟
بس لما ركزت إكتشفت إنه فيه مليون حيطة ممكن يسند عليها وياخد منها كل الطاقة اللي محتاجها. الموضوع بس محتاج شوية وقت وصبر.

ميار:
بخاف من الصفحة الفاضية
بفضل واقفة قدامها كتير
بمسك القلم وأسيبه
كذا مرة
والوقت يمر
لحد ما بزهق، فبقفل الصفحة
وبحاول تاني بكرة

نهال:
الملل بيختفي بعد وقت قصير أول ما بنزل اتمشي بالعربية، أكنه دوا هينتهي مفعوله بعد كام ساعة، والزحمة بتقتلني وبتحسسني بالخنقة بس بنسى معاها الملل اللي بيحاوطني في كل مكان حتى و لو بشكل مؤقت.

تمت ورشة الكتابة للمبتدئين مع فاطمة الزهراء ومنصة “ملنيل ع الآخر” في شهر يوليو ٢٠٢٤

انتجنا النصوص والرسوم دول في خلال ٤ ساعات مدة الورشة

شارك في الورشة:
إسلام عِمري
آلاء عيده
سارة بدر الدين
سما الشربيني
داليا ياسر
محمد روبي
محمود صفي
ميار سلامة
نهال عمار