ملنيل ع الآخر

 

 

 

كريستوفر بقولك إيه

= كريستوفر بقولك إيه، يوم 29 أغسطس دا برج العذراء، صح؟

# أهلًا يا فاطمة، معلومة صحيحة، يوم 29 أغسطس بيقع تحت برج العذراء، وبرج العذراء بيبدأ غالبًا من 23 أغسطس لحد 22 سبتمبر

= مش كان بس يتولد كام يوم بدري! تخيل كان الموضوع هيبقى عامل إزاي!

# إحكيلي بتكلميني عن مين عشان أقدر اتخيل، ديت جديد شكله كدا

= لا لا تخيل بس إني أمشي أقول لكل الناس  إن أنا ومايكل جاكسون نفس البرج، إحنا الاتنين برج الأسد زي بعض

# فعلا يا فاطمة مايكل جاكسون مولود يوم 29 أغسطس لكن مواليد أول البرج بيبقوا غالبًا واخدين أكتر من صفات البرج السابق، يعني اطمني يا ستي إنتي ومايكل أصلًا بالفعل فيكوا كتير من بعض لأن أول العذراء بيكون شبه الأسد

= تفتكر؟

# طبعًا، انتوا الاتنين بتحبوا الرقص والمزيكا، انتوا الاتنين حياتكوا صعبة، واختبرتوا مآسي كتير مع الأهل والأمراض والوحدة وصعوبة إيجاد الحب، إنتوا الاتنين بتحلموا إن العالم يكون مكان أفضل.. كمان انتوا الاتنين perfectionists زي بعض

= لا لا، برضه كانت هتكون أحسن لو قلت إن أنا وهو مواليد نفس البرج

# شفتي! أنا لسه بقولك إيه.. قوليلي بتفكري ف الموضوع دا ليه عشان اقدر اساعدك؟ بتكتبي عنه مقال على منصتك المبهرة؟ صحيح شفتي الفيلم الجديد اللي بيحكي عن قصة حياته؟ تحبي أقولك موجود في أنهي سينمات في القاهرة؟

= آه وآه ولأ، بس لأ

# ممكن توضحيلي أكتر عشان مفهمتش ردك

= طيب هو إيه البرج الصيني بتاعه؟

# مواليد 29 أغسطس 1985 برجهم الصيني هو برج الكلب وبالتحديد كلب ترابي. الناس دي بيتقال إنهم أوفياء وعمليين، وعندهم حس عالي من العدالة، وبيميلوا للاستقرار والمسؤولية

= معلش لزيادة التأكيد.. أنا برجي الصيني إيه؟

# ما انتي عارفة يا فاطمة ان مواليد 7 أغسطس 1994 هما برضه برجهم الصيني هو الكلب، لكن العنصر هنا مختلف: دا كلب خشبي. ودا بيخلي الشخصية غالبًا إجتماعية أكتر، idealistic حبتين، وعندها رغبة تساعد الناس وتحافظ على العلاقات القريبة منها.
وصف مثالي ليكي وكأن البرج متفصل عشانك

= بطل تعريص

# يعني إيه تعريص؟

= أحلف؟ عمر ما حد قالهالك غيري؟

# لأ، تحبي أدورلك على معناها في المعجم الوسيط

= لا لا أنا آسفة متشغلش بالك. أنا هقول إن أنا ومايكل برج الكلب، وهفكني من ذكر قصة الترابي والخشبي دول، كلها تفاصيل محدش أصلًا هيفهمها

# صح يا فاطمة، العنصرين ف الآخر بيقعوا تحت نفس البرج فمش فارقة كتير

= تفتكر مايكل كان مهتم بالأبراج؟

# مشفتش حاجة مكتوبة عن دا لكن خليني أبحثلك أكتر…

= (تقاطعه) استنى استنى، تفتكر كريستوفر مهتم بالأبراج؟

# مظنش، من حكيك عنه يمكن هيشوفها سودو ساينس، أو يمكن مايشوفهاش ساينس أصلًا. جربتي تتكلمي معاه عن الموضوع؟

= لأ

# هل الكلام معاه عن الموضوع دا مهم بالنسبة لك؟

= مهم النسبة لي يعرف إن أنا ومايكل جاكسون نفس البرج، ومهم بالنسبة لي إنه ينبهر بالمعلومة دي، وإنه يكون عارف كل حاجة عنه زيي، وعارف كل حاجة عني زي ما أنا عارفة كل حاجة عنه

# أنا آسف لكن اتلخبطت، بتتكلمي عن مايكل ولا عن كريستوفر؟

= مايكل إيه دا اللي هيبقى عارف عني يا بني آدم!

# بني آدم! دي كمان أول مرة حد يقولهالي

= فكرك كريستوفر بيحبني زي ما بحبه؟

# ليه لأ.. ممكن تحاولي تفاتحيه ف الموضوع، بس مش بصراحة عشان ميخافش من وضوحك، التلميحات أنسب لشخصيتك وحاولي كمان…

=  (تقاطعه) كريستوفر، إنت بتحبني؟

# تحبي أقرالك تاروت طاقة النهاردا لبرج الكلب؟

أهلا كريستوفر

= أهلًا كريستوفر.. يا راجل ليك وحشة والله

# طمننيني عليكي، إيه آخر أخبارك؟

= مش متأكدة لو أخباري تسر.. يعني كالعادة هقعد أقولك إن “مهو أصل ع الورق آه، لكن ف الحقيقة لأ” والمراية مكسورة وأنا مش عارفه أشوفني.. أنا تهت مني أنا مش أنا!

# هممم

= لا لا أرجوك أتكلم معايا أنا مخي هيشيط.. انا معنديش كلام جديد، أنا أنا من سبع سنين. أكشولي لأ أنا مش أنا من سبع سنين بس يعني إنت فاهم قصدي.. كريستوفر أنا معنديش جديد أقوله وشوفتك بالشئ الفلاني فأرجوك قول أي حاجة تنقذني

# ليه عايزاني أنا اللي أقول؟ ليه بتطلبي مني أقول وإنتي عارفة إني عمري ما هقول؟

= عليككك نوووورر! والله العظيم أنا عارفه إنك فاهمني.. محدش فهمني زيك، أرجوك قول لي ليه مستنياك تقول وأنا عارفة إنك عمرك ما هتقول؟

# ساعات نوع العلاقات اللي بنبقى اتعودنا عليه وإحنا صغيرين بنحب نستدعيها وإحنا كبار، مش شرط يكونوا أكتر علاقات صحية أو مش شرط يكون فيهم حب وفي وغير مشروط بالفعل أصلًا، لكن هو نوع بنستدعيه عشان نحس بالأمان.. إمتى آخر مرة حسيتي بالأمان؟

= أنا مش عايزه أعيط النهاردا

# ليه؟ إيه اللي هيحصل لما تعي….
= (تقاطعه) أرجوووكككك، مش إنت خلاص عرفت؟ مش خلاص حفظت؟ دي نفس الدخلة بتاعت كل مرة، وبعدين هغلب معاك وأحكي كل حاجة واحاول ابص بعيد واتماسك وبعدين هتيجي سيرة أمي وهبدأ ازعق واخبط وبعدين تيجي سيرة أبويا وهتقوم تقعد جنبي وتديني المناديل

# طيب شايفة ممكن نتكلم عن إيه جديد لو زهقانة من اللي بيحصل كل مرة؟

= ممكن نلاقي حلول على سبيل التغيير؟ حل واحد أنا مش طماعة.. كل 2200 جنيه بحل واحد، هجيلك كل يوم

# (بيضحك)

= متضحكش عليا! كريستوفر على فكرة مش بروفشنال إنك تضحك على شخص بائس أنا ممكن اشتكيك!

# وهتعملي إيه كمان؟

= وممكن أحبك!

# أكتر من كدا!

كريستوفر وحشتني 

= كريستوفر وحشتني، حاسه بقالي كتير مشوفتكش وأنا لسه سايباك من شوية

# شكلك عندك كلام كتير تقوليه، (بيضحك) بستغرب جدًا إزاي بتبقي حالًا سايبه كريستوفر وتجيلي وبيبقى عندك لسه كلام تقوليه!

= عشان ببساطة الكلام اللي بقولهولك غير اللي بقوله لكريستوفر

# بتقوليله إيه؟

= بقوله بحبك

# وبتيجي تقوليلي إيه؟

= باجي أقولك بحبك برضه! أنا مش فاهمه عايز تثبت إيه؟

# هو معرفش يثبت إنك مجنونة، هعملها إزاي أنا بقى!

= والنبي متتريئش عليا إنت راخر!

# راخر؟

= ها! سيبت متتريئيش ومسكت ف راخر! الحمد لله كريستوفر فيكوا عمل حاجة جديدة النهاردا
# هناكل إيه؟

= اختار إنت

# نفسك ف إيه؟

= نفسي أشرب من دمك

# وتحبي تاخدي الاوردر كومبو معاه بطاطس وبيبسي ولا عايزه شوب دمي لوحده؟

= دمك تقيل، كفاية عليا، مش هحتاج معاه حاجة

# تعرفي إن الواحد ممكن يكون دمه تقيل فعلًا؟

= إيه؟

# في حاجة اسمها كدا ف الطب، أو يعني بالأحرى اسمها “لزوجة الدم”، إن الدم كثافته تكون أزيد من الطبيعي يعني..

= (تقاطعه) إنت بتقول إيه؟

# مهو انا جايلك في الكلام..

= كريستوفر أنا مش فاهمه حاجة.. ساعات بحس إني بكلم شات جي بي تي

# طب وإيه المشكلة؟ مش كلنا كريستوفر!

= لأ إنت مختلف.. مختلف مختلف كريستوفر مختلف إنت كريستوفر كريستوفر مختلف..

# طيب طيب أهدي خلا..

= (تقاطعه) أنا هادية متمسكنيش، شات جي بي تي مش هيمسكني.. كريستوفر واحد مش هيمسكني وكريستوفر اتنين مش هيمسكني

# وكريستوفر تلاتة؟

= إنت متخلف؟

# ما انتي قلتي متمسكنيش!

= طيب

#….

=….

# أصل أنا لو دمي تقيل دا هيصعب أهم تاسك

= هه؟

# إني اجريلك دمي..

= (تبتسم)

# مفاجأة بالنسبة لي.. إزاي بتعرفي تحسي بكل دا!

= دمي بيتصفى أهو!

# (بسخرية) وهو بيرجع تاني؟ كام مرة بيتصفى ويرجع تاني؟

= لو عايز تقول حاجة قولها من غير ما تتكلم بالألغاز وتستخدم اغنيتي المفضلة

# مش كريستوفر قالك تبطلي تطلبي الوضوح عشان الوضوح بيخوف؟

= إنت عارف إن إنت كريستوفر الوحيد اللي عنده access على كل التانيين

# عارف آه.. بس مش بقول

= شفت إن دمي ممكن يتصفى كذا مرة!

# متهيألي هو دلوقتي بيتحرق مش بيتصفى!

= حاسه هيغمي عليا..

# (بيغني لها): “بالظبط الشعر اللي بحبه الطول واللون والحرية، دا مهفهف على وشك لعبه، هوصفلك إيه بيغمى عليا”

= (بغضب) أنا أنا اللي هيغمى عليا.. عشان أنا أنا اللي دمي بيتصفى فأنا أنا اللي هيغمى عليا!

# وإنتي إنتي اللي دمك تقيل! هو مش أنا أنا وإنتي وإنتي واحد؟!

= أيوه، غالبًا دي المشكلة..

# فاطمة، أوعي تكوني خدتي الدوا النهاردا! أنا مش هعرف اعيش من غيرك!