ملنيل ع الآخر

كتابة: عبد الله كابيلو

رسم: أحمد ليسي

بصراحة كدا، إحنا محتاجين نتكلم..

عارفه إني قلقتك مرة كمان، لكن قلت يمكن كوباية القصب الساقعة تبقى بتهديك وإحنا بنتكلم..

أو وأنا بتكلم.. المرة دي هتكلم لوحدي شوية.

أنا مبقتش عارفة.. أنا كويسة ولا وحشة؟ بتحبني ولا بتكرهني؟

بتقعد تلعن وتسبّ فيا طول الوقت، وتقول إنك كارهني، وأول ما أغيب شوية تتهز وتدخل في Panic، وتقعد تدعي ربنا أرجع. وأول ما أظهر ألاقي في عيونك نظرة اللي لقى ضالته بعد ما كان تايه.

لو فصلت منك في نص اليوم وحياتك وقفت فجأة، ده علشان محتاجة منك شوية اهتمام. ولو طلّعت صفارة عالية تطرّشك أكتر في لحظة بتحاول تحضن فيها حد، فأنت تستاهل.. علشان بغير عليك.

بس برضه حس بيا. إحساس إن الناس بتعاملك عادي كأني مش موجودة بيقتلني كل يوم. علشان كده لازم أبين نفسي وأخليك متوتر ومش سامع كويس في أي مكان أو أي تجمع. وأخليك تميل للعزلة.. علشان نقضي وقت لوحدنا سوا.

مكنتش بتستحمل الأناني والبجح، وأنا زوّدتلك عليهم كمان الصوت الواطي أوي أو العالي أوي.. أي خدمة. 

وكان لازم أقتل حبك الأول.. الموسيقى، خليتك تسمع كل حاجة بكواليتي التليفون الأرضي. أعمل إيه يعني! قلتلك بحبك وبغير عليك.

عمرك سألت نفسك أنا حاسة بإيه وإنت مكتئب علشان فقدت متعتك معاها؟ للدرجة دي وحشاك؟ للدرجة دي مش شايفني؟ ولا نخليها.. مش سامعني؟!.

مش عارفة بقى، استاهل كل التكسكة دي؟ لدرجة إنك تُحرج وتستعر مني لو حد شافنا مع بعض؟ عارفة إن مخك بيتقل بيا، وإنك بتبذل مجهود أكبر بكتير علشان تتعود عليا. 

عارفة إنك بعدي ما بقيتش زي الأول. عامل زي اللي كان بيسمع كواليتي 4K وفجأة لقى نفسه على p144 مبكسلة.

مش لما كنت بتلعب جيتار كنت بتحب صوت الـ distortion؟ طب ما أنا خليتك عايش فيه طول الوقت! 

مش كنت بتحب فيلم “الصرخة” وانت صغير؟ طيب ما الصفارة دي هي نفسها.

بتعيط ليه دلوقتي؟ كبرتك ٥٠ سنة على سنك.. وإيه يعني؟ مش إنت متبني الـ slow living؟

حاسّة إنك ظالمني، سيكا، مزيكا، صفارة، وجع ودن، وطنين.. كل ده مخلّيك تتعالج من الاكتئاب؟ بطل دلع بقى، إنت مرفّه يلا!

مش قادرة أستوعب إنك لسه ما تقبلتنيش.. ولسه مش فاهم إننا خلاص مكتوبين لبعض. ما تفوق يسطا.. إحنا ملناش غير بعض.

محتاج إيه كمان عشان تستوعب؟ أقرب منك إيه أكتر من كدا؟ خلصت معاك كل الطرق، اللطيف منها والتوكسيك..

بس خلاص بقى، كفاية دلع عليا.. وهسميه دلع عشان مزعلش منك وإنت عارف زعلي.

مالناش غير بعض، أنا وإنت وكوباية القصب، وصوت واطي من بعيد بيقولك “إنت مش لوحدك طول ما أنا معاك”.