ملنيل ع الآخر

كتابة: فاطمة الزهراء

آخر خمس سنين وبالأخص بعد الجائحة؛ كتير مننا بقى بيقضي ساعات شغله في البيت ومبقاش مرتبط بمكتب أو مكان محدد للشغل أو حتى الانترفيو.

مقابلات العمل أحيانًا بتكون موترة شوية لأنها بتكون مرتبطة معظم الوقت بدخولنا مرحلة جديدة ومناخ مختلف وناس أول مرة بنتعرف عليهم. أوقات بيكون اللقاء الفعلي بيساعد على تقليل التوتر لو الفريق اللي بيعمل معانا الانترفيو لطاف ومريحين، لكن ماذا لو بنعمل الانترفيو دا على بعد كيلومترات ويمكن أميال وقادرين نتقابل بس عن طريق الانترنت؟

في المقال دا هقدم لكم ٧ نصائح من تجربتي الشخصية هيساعدوكم تقدروا تجتازوا مقابلة عمل أونلاين بنجاح.

• البس فورمال زي ما تكون رايح انترڤيو من فوق لتحت

يوم الانترفيو بننصح تلبسوا فورمال كامل من فوق لتحت كأنكم قاعدين معاهم في المكتب، آه محدش هيشوف اللي تحت مربع كادر الكاميرا لكن دا هيزود إحساسكم بجدية اللحظة وهيساعدكم تكونوا واثقين من نفسكم أكتر. 

ويا شباب لما ناخد الشغلانة نبقى نلبس فورمال فوق وخلينا بالشورت تحت عادي!

• اختار مكان مناسب ومريح

المحيط والخلفية والصوت عوامل مهمة، اختاروا أوضة تكون بعيدة عن الدوشة، والخلفية وراكم يفضل تكون حيطة فاضية أو لوحة أو مكتبة مثلا، لكن مش تليفزيون ولا شماعة هدوم وما شابه.

ظبطوا الإضاءة، خلوا النور قدامكم مش وراكم عشان تكونوا باينين كويس.

• ادي تحذير مسبق للشركاء في البيت

سيبوا خبر كدا لشركاء البيت إنكم داخلين مقابلة عمل مهمة اونلاين بعد شوية، عشان تتجنبوا أصوات النداء المحرجة أو الخناقات وما شابه.

أما عن صوت عمو بياع الأنابيب في الشارع فدا خلاص بقى عنصر معتاد ومفهوم ومنقدرش نتحكم فيه.

• تيسسست!

اتأكدوا إن اللاب توب متوصل بالشاحن، جربوا الانترنت وخلي عندكم خطة بديلة لو الإنترنت فصل في البيت، زي مثلا انكم ممكن توصلوا هوتسبوت من انترنت الموبايل أو تنزلوا كافيه قريب عارفين إن الانترنت هيكون قوي فيه. 

جربوا الكاميرا والميكروفون واتأكدوا إنهم شغالين كويس، الصورة تمام والصوت واضح.

• اسمع كويس ولو فوتت فقرة اطلب اعادتها واتحجج بالانترنت

بدأنا الانترفيو، خليكوا هاديين ومبتسمين، اسمعوا كويس أكتر ما تتكلموا غير لو حد سألكم، ماتقاطعوش واستنوا دوركم. خلي معاكم ورقة وقلم وخدوا ملاحظات أول بأول للنقط المهم واكتبوا قائمة بالأسئلة اللي عندكم كمان وأسألوها في آخر جزء من المقابلة.

• الاهتمام بيتطلب عادي في الشغل!

اقرأوا عن الشركة اللي بتعملوا الانترفيو معاها كويس واعرفوا أهدافهم والمشاريع اللي كانوا شغالين عليها والمشاريع اللي شغالين عليها حاليا، مهم تبينوا انكم مهتمين ومتابعين للشركة ومشروعاتها، وحابين تشتغلوا معاهم لأن أهدافكم وأفكاركم قريبة.

• وأخيرا.. ريلاكس، الفرصة المناسبة هتيجي

عارفه إن الأجواء عامة حاليا موترة والشغل بقى مهم أكتر من أي وقت وكلنا بندور على فرصة مناسبة نرتاح فيها وتساعدنا نحقق أحلامنا، تعالوا نحاول نستمتع بالرحلة على قد ما نقدر ونحاول نقلل القلق شويتين.

الدنيا هتمشي كدا كدا، بأحداث كويسة وكمان مشاكل، مهم نخلي بالنا من صحتنا النفسية خلال الرحلة دي ونجرب على قد ما نقدر نستبدل المشاعر السلبية زي التوتر والقلق بالإيمان إن الموضوع فيه عوامل كتير غيرنا، لو نجحنا مبروك علينا ولو لأ يالا نحاول تاني.

بتمنى لكم رحلة ممتعة وثرية، وبالتوفيق في كل خطواتكم دايما.