ملنيل ع الآخر

كتابة: فاطمة الزهراء

عزيزي القارئ، لو إنت من جيل الملينيالز زينا يبقى أكيد عارف إحنا بنتكلم عن مين ولو من چين زي يبقى غالبًا مش محتاج تعرف أسباب حبنا لهاري ستايلز لأنك غالبًا هتكون عارفهم وبتحبه معانا، بس لو إنت زميل عجوز شوية فالمقدمة الجاية دي علشانك، علشان يبقى عندك خلفية يعني وكده وأبقى أشكرنا بعدين.

هاري ستايلز مغني بريطاني شاب، بدأ رحلته من 2010 مع فريق “One Direction” وحققوا نجاحات عالمية كبيرة لحد ما الفرقة اتحلت سنة 2016، بعدها بدأ كل أعضاء الفرقة ينتجوا ألبومات لوحدهم. هاري ستايلز أنتج ألبومين لحد دلوقتي معظمهم أغاني جميلة جدًا زي Golden, Sign of the times, Falling, Kiwi, Adore you, Sweet creature وغيرهم.

جلينا بقى يا سيدي من كل الأجناس بيحب ومولع بهاري ستايلز بشكل كبير، يتابعوا أغانيه وحفلاته وحياته العاطفية وإنترفيوهاته واختياراته المذهلة المؤثرة لستايل شعره ولبسه ويعني في حالة في العشق والتتبع لل performance على بعض. وده خلانا نتسائل ونحاول نفهم طب ليه؟!

الكام نقطة الجايين هحاول فيهم أقول كام سبب من أسباب حبنا لهاري ستايلز في وجهة نظري، وطبعًا الأسباب لا تعد ولا تحصى والله بس أهو قولنا نبلغ الزملا يمكن يبصوا على صاحبهم ويقتنعوا وتعم الفائدة وننبسط كلنا.

• مش بيتكسف يلبس اكسسوارات وهدوم تصنف أنثوية.

في وجهة نظري، كل واحد فيها جواه جوانب وشخصيات مختلفة، حتى لو مكنش بيظرها في العلن أو مديها فرصة في الخفا، كلنا بنختار في أوقات معينة ومواقف معينة نبرز أي جانب فيهم أو نوازن بين الجوانب. لبعض الأسباب في مجتمعنا وبعض المجتمعات الثانية بنلاقي نفسنا محشورين في الثنائية الجندرية بتاعت مذكر ومؤنث، فبنخط في اعتبارات زي إن “عيب” الراجل يبرز الجانب الأنثوي عنده وده بيبان في كليشيهات كتير سامة زي: “مفيش راجل يلبس بمبي أو أحمر” – “مفيش راجل يعيط”… وغيرهم.

كسر هاري للأكواد الجندرية المُتعارف عليها من أكثر الحاجات السيكسي اللي ممكن نشوفها في راجل. صدق أو لا تصدق يعني. وشفنا دا في أمثلة كتير زي تيموثي شالاميه وبيت ديفيدسون وليل ناز إكس وغيرهم.

• ستايلز عنده ستايل!

هاري مهتم جدًا بالموضة وبيمثل أكثر من علامة كبيرة زي جوتشي، ،مؤخرًا بقى عنده العلامة الخاصة به اللي بتنتج أدوات جميل. هاري كمان كان أول راجل يطلع على غلاف مجلة فوج للموضة، وظهر لابس فستان!

في كل الفعاليات.. مهرجان أو حفلة أو أي إحتفال، كلنا بنستنى إطلالة هاري اللي متفقين على إنها هتكون بلا شك مميزة ومفاجأة وتاخد العين والقلب طبعًا. مظنش حد من معجبيه اختلف على قطعة لبسها هاري قبل كده، هو جرئ ومُجرب وكيوت جدًا برضه. فيعني لبس بدلة أو فستان بتلاقينا واقعين في غرامه في الحالتين لأن بيكون واضح جدًا قد إيه هو مرتاح ومؤمن بالإختيار ده وده بيخلينا إحنا كمان عايزين نعيش معاه نفس حالة الاتساق والسلام مع النفس والراحة دي.

وعلى مدار السنين، أصبح أيقونة للموضة جيل كامل بينتظر الجديد منها ويحاول يقلده. شوفنا أولاد كتير تسامحوا مع إرتداء جيبة أو فستان بعد ما هاري عمل كده وطبعًا الجاكيت الكروشية الملون الشهير اللي كتير مننا اتعلم يغزل كروشية مخصوص علشان يعمله.

• موهوب، صوته هايل وألحانه مميزة وكتاباته ثقيلة وقريبة مننا.

لو سمعت أغاني لهاري ستايلز هتفهم النقطة دي بسهولة وبدون شرح. هاري صوته جميل جدًا وبيغني ببساطة وإحساسه واصل لحد كبير، في أغنية واحدة ممكن تفرح وتحزن وتحس إنك لوحدك وفي نفس الوقت إنت مش وحيد وتتنطط وتفرح وتحزن وهكذا. هو كمان كاتب موهوب، أغانيه مناسبة للسمع في أي وقت وأي حالة بتعيشها.

• دمه خفيف.

أظن هاري لو مكنش صوته حلو كان ممكن يكون ستاند أب كوميديان أو ممثل ببساطة، عنده حضور وكاريزما وخفة دم لطيفة جدًا، يدخل القلب على طول يا جماعة.

• جوكر!

هاري ممكن تحطه في أي هينور! من المميز في موهبته كموسيقي إنه لما بيغني أي أغنية مش بتاعته.. بيعمل cover لعمل فنان تاني يعني بيصيب بصمة فريدة وواضحة وبنتفق معظم الوقت على إنه غنى الأغنية دي أفضل من مغنيها الأصلي.

• إنسان!

مش هتكلم عنه بشكل شخصي لأني معرفوش شخصيًا أكيد، وعادي ممكن يطلع كل دا بيرسونا مبنية بذكاء وشطارة عشان نقع في حبه بهذا الشكل، لكنه دايمًا بيفكرنا نكون بني أدمين كويس مع بعض، من خلال دعوات واضحة في حفلاته أو كلمات أغانيه أو ردوده في لقاءاته المختلفة. آراء تخص قبول الناس وقبول الشخص لذاته والتعامل بطيبة وتواضع، تقبل كل مختلف، إحترام الستات ودعم المطحونين المُهمشين زي الستات برضه والمثليين والعابرين جنسيًا وغيرهم.

ومنقدرش ننكر قد إيه دا مهم يطلع من شخص مؤثر على ملايين زي هاري ستايلز.

• وأخيرًا، لما ألين ديجينرس سألته: “إيه أكتر 3 حاجات بتحبهم في جسم الست؟” قال لها: “العيون والإبتسامة والشخصية”. حاسه إني مش محتاجة أعلق على النقطة دي أو أقول حاجة تانية يا خلاص.