ملنيل ع الآخر

 

كتابة: فاطمة الزهراء

 

كتير مننا بدأت يتوتر ويقلق ويسأل نفسه: “لما أكبر مين هيراعاني، لما أعيى مين هياخد باله مني؟!” وبمنتهى التهور النابع من التوقعات الكبيرة جدًا الموجودة في السؤال السابق، أول حاجة بتخطر على البال: “يالا نعمل أكاونت على تندر ونشوف إيه الكلام”. وعادةً وللأسف مش بيحصل أي حاجة وبتكون تجربة محبطة للبنات وللأولاد.

 

في الأول، كنت بلوم الأبلكيشن نفسه وبحس إنه مش مناسب خالص وفيه مشاكل كتير، لكن بدأت أبحث شوية في الموضوع ولقيت إن معظمنا بيسيئ استخدام الأبلكيشن وده بيكون سبب كبير في إنه مش بيقدر حتى يدير شات ناجح مع ماتش حصل عليه بالعافية فأكيد طبعًا مش هيوصل بالشكل ده للي هيرعاه لما يكبر وياخد باله منه لما يعيى! 

وكمان في كتير بيستخدموا الأبلكيشن لأغراض مختلفة عن المواعدة، زي الشغل وتكوين أصدقاء وغيره!

طب ما اللي عايز يشتغل يروح لينكد إن يا جماعة، واللي عايز يتعرف على أصدقاء هو فيسبوك قصر معاك في حاجة!

 

في المقال ده، هحاول أساعدك تعرف إزاي تبني أكاونت جاذب على تندر وربنا يرزق بالماتشز من عنده بعدها، وأهي تجربة.. محدش خسران حاجة، إنت كده كده وحيد ومش ظابطة معاك، فتعالى نلعب ونجرب يمكن تظبط.

 

• اكتب اسمك الحقيقي، متكتبش nickname 

الاسامي المستعارة دي حاجة كبيرة وشخصية، أصحابنا وأهلنا والناس القريبين لنا عامة هما اللي  بيكون ليهم مساحة يندهونا بيها ونحب نسمعها منهم، مش منطقي تكتب اسمك “مودي” مثلًا والمفروض  أول كلام بيني وبينك أدخل أقولك: “إزيك يا مودي؟”، اكتب اسمك عادي وبعدين نشوف لو علاقتك بالطرف التاني تطورت استناه لما هو يحب يديلك اسم مستعار ويبدأ يندهلك بيه، متفرضوش عليه من بدري، حاول إنك تسهل على الشخص التاني إنه يناديك ويتكلم معاك.

 

• حط صورتك لوحدك

بستغرب جدًا من الموضوع ده، ليه تحط صورتك مع صاحبك على أبلكيشن مواعدة!، أو مثلًا تحط صورتك مع مجموعة بنات. خلي بالك وماتستهونش بالصور اللي بتحطها لأن محتواها ممكن يكون بيوصل رسائل إنت مش قاصدها ومش عايز تقولها. على سبيل المثال: صورتك مع البنت أو مجموعة البنات دي بتدي إنطباع إن الشخص عايز يقول إنه روش بالفعل وحواليه بنات كتير أوريدي ومقطع السمكة وديلها، فتمام يا شبح.. ويا بختك طبعًا، جاي بقى تندر تعمل إيه! 

وعلى سبيل المثال والتجربة: كل ما بشوف واحد حاطط أول صورة له هو وصاحبه بتأكد إنه هيكون الأقل جمالًا في الإثنين وده بيتم تأكيده لما بعرف هو مين فيهم من الصور التالية، ودي حاجة مش لطيفة خالص إنك تكون بتقيس إحتمالية وإمكانية قبولك بشكلك أو بشكل أصحابك، كل إنسان جميل بشخصه وثقافته وقدر تعليمه وأخلاقه، مش بحلاوة شكله وشكل صاحبه.

 

• متحطش صورة طفل معاك

دي حاجة مريبة شوية برضه، يتفهم منها حاجات كتير، إما إنك مُطلق وعندك أطفال ومفيش عيب في كده بس دي معلومة متقدمة ممكن تقولها للشخص بعدين لو حسيت براحة وثقة تجاهه، لكنها في وجهة نظري مش ألطف حاجة ممكن تبدأ بيها.

إما دول أطفال حد من أخواتك أو قرايبك وإنت مثلًا عايز توصل رسالة إنك زوج محتمل لطيف وبتحب الأطفال ودي برضه معلومة لطيفة ممكن تتقال في مرحلة متقدمة من معرفتك بالشخص اللي بتكلمه علشان إحنا مش المفروض ندخل بمنطق الجواز من أولها كده، نتعرف بس ع الناس الأول.

وإما حاجة تالتة مرعبة وغير إنسانية أو قانونية وهو إنك تكون بتستهدف أطفال من الأبلكيشن وأتمنى لك مصير سئ ومقرف زي أفعالك.

شوفت الرسائل اللي ممكن تكون صورك بتوصلها وإنت مش واخد بالك؟.. بلاش صور مع أطفال أحسن.

 

• متحطش صورتك مع حد مشهور

معلش موضوع الرسائل ده هيفضل مكمل معانا شوية كتير في المقال ده، فمتزهقش بدري. هنا الموضوع حاجة من الإتنين، إما إن هذا الفنان أو لعيب الكورة أو غيره المشهور صديقك فعلا وعادي بتتقابلوا وتتعاملوا في الحياة اليومية فده هيرجعنا إلى ثان قاعدة وهي “حط صورتك لوحدك”، وإما هذا الشخص إنتوا اتقابلتوا مرة صدفة في مكان ما وحبيت تخلد هذه الذكرى بصورة لطيفة، ممكن تشيرها على فيسبوك أو على انستجرام لكن على تندر الصورة دي هتقول لي إنك عايز تبين إنك جامد وبتصاحب مشاهير وواصل وكده. وحقيقي بيبان من الصورة إنتوا صحاب ولا دي كانت صورة مع معجب. فبلاش منها أحسن، وصدق إنك مهم علشان شخصك مش علشان إنت بتروح أماكن غالية مثلًا وأصحابك مشاهير أو بتقابلهم صدف وبتتصور معاهم.

 

• التنوع مهم ومفيد

بشوف أكاونتات كتير حاطين نفس السيلفي في نفس المكان بنفس تعبير الوجه ووقفة الجسم وأحيانًا بنفس اللبس، ليه تحط نفس الصورة تقريبًا مكررة لما ممكن تحط صور مختلفة تبين إنك شخص متنوع وعندك حياة مليانة حاجات مختلفة وبتروح أماكن كتير، صورة في المكتب وسيلفي في البيت وصورة ع البحر وصورة في المطعم أو البار وصورة لحيوانك الأليف أو للزرع بتاعك أو ليك وإنت بتعمل هوايتك المفضلة أو صورة من الجيم أو صورتك وإنت بتقرا كتابك المفضل وهكذا. التنوع مفيد وبيوصل رسائل كويسة بتفيد إنك شخص مش محدود ومش ممل وبتعمل أنشطة كتير في حياتك. 

 

• أوعى تسيب البيوجرافي فاضية

البيو مهمة جدًا، وهي الفرصة اللي ممكن تكتب فيها عنك وعن اهتماماتك بشكل واضح دون الخوف من إن ممكن يكون في رسائل بتوصل بشكل خاطئ. كمان جزء كبير من أهميتها بيكمن في إنها بتسهل الطريق على فتح الحوار مع الشخص اللي بتكلمه، يعني مثلًا أنا لو كتبت في البيو بتاعتي إني بشجع نادي الزمالك فده موضوع ممكن نتكلم فيه أو مثلًا إني بحب القهوة أو إني بحب التمشية أو الرياضة وغيره.

مهم كمان إنها متبقاش lame وإنت نفسك تكون شخص لطيف علشان مهم تبقى عارف إن قلة الذوق والسخافة مش روشنة خالص، ولو قفشت نفسك بتعمل ده فحاول تعرف أسبابه إيه وتتكلم مع طبيب أو أخصائي نفسي يساعدك على حل المشكلة دي.

أكتب بالعربي أحسن ما تكتب إنجليزي غلط، مش مطلوب منك تكتب إنجليزي لو بتستهدف مصريين أو عرب بس، الكتابة بالعربي مش عيب ولغتنا جميلة جدًا ومليانة تعبيرات وصفات وافية أفضل من أي لغة تانية. 

تعالوا نجرب نكتب بيوجرافي سوا كمثال:

“بحب البحر والحيوانات بس بفضل القطط عن الكلاب، ساعات هتلاقيني في الجنينة الصبح بدري بلعب يوجا وساعات هتلاقيني في السرير بحرق موسم من مسلسل في قعدة.

بحب القهوة أكثر بس معنديش مانع نتشارك كوباية شاي بعد غدا لطيف.”

 

• مش محتاج تكتب طولك قد إيه، ده مش اوديشن تمثيل

الجواب باين من عنوانه، الشكل مش كل حاجة وصدقوني معظم البنات مش بتفكر بهذا الشكل، بيهمنا الشخصية والحنية والتفهم والتفاهم وإن حد يسمعنا وإننا نلاقي شخص موجود لما نحتاجه، لكن كونك 190 سنتيمتر ومش بتتوافر فيك أي حاجة من الحاجات السابقة ده مش هيساعدك بأي شكل.

الطول مش حاجة حلوة والقصر مش عيب، المهم إبتسامتك وشخصك وروحك الخفيفة. وكفاية صور توبليس في الجيم، صدقني الفورمة هتبان عادي وإنت لابس تيشيرت أو قميص، الصور دي أحيانًا كتير بتكون عامل طرد مش جذب. وتاني أفتكر دايمًا إن مبدأ “الفورمة بتجيب حرمة” ده مبدأ ذكوري وأكذوبة كبيرة، الحنية واللطف والإحترام هي اللي هتجذب الطرف التاني ليك.

 

• حاول تخلي اكاونتك موثق verified 

ما أكثر الاكاونتات الـ fake على مواقع المواعدة والعياذ بالله، كون اكاونتك موثق بيساعد كتير إن الشخص اللي قدامك يحس بالثقة شوية تجاه اكاونتك إنه بيمثل شخص حقيقي مش أكاونت fake، فحاول إن أمكن تحصل على الصح الزرقا اللي بتساعد كتير في إن شخص يثق في إنك حقيقي ويعمل لك لايك.

وافتكر دايمًا تكون لطيف وذوق وخفيف ومش لحوح، وخد الدنيا ببساطة ومتتوترش، وكله هيحصل ويجي في ميعاده..

ولحد ما تجرب الحاجات اللي فاتوا دول وتظبط بروفايلك وتبدأ تعمل لايكس وتكون جات لك ماتشز جديدة، اقرا المقال الجاي عن إزاي تدير شات ناجح على مواقع المواعدة وتنزل أول ديت.