ملنيل ع الآخر

غيوم فصل الشتا ساعات مبتكونش في السما بس، ساعات بتحل على أرواحنا.. بتخنقنا بإكتئاب أو أفكار سلبية بنحاول نتجنبها طول الوقت. غياب الشمس بيأثر كتير على نفسيتنا وبنصاب بهشاشة نفسية بسيطة وبيكون لطيف جدا لو معانا شريك نقدر نعبر له عن مشاعرنا ونشاركه حياتنا واهتماماتنا في هذا الوقت الصعب.

ساعات مبنكونش مستعدين لعلاقات طويلة الأمد ولخطط بعيدة، ساعات بيكون أنسب لنا ندخل علاقة نقضي بيها الوقت الحالي.. علاقة محدودة بمدة معينة وشروط معينين أو زي ما هنسميها في مقالنا دا “صحوبية الموسم”.

دلوقتي هقدم لكم ٥ نصايح من خلال تجربتي الشخصية، نقدر من خلالهم ندخل صحوبية الموسم ونقضي وقت لطيف وسعيد ونخرج سالمين غانمين.

• اختار صح

مش معنى إننا داخلين علاقة لمدة زمنية معينة ولأهداف محددة إننا نعمل كدا مع أي حد، مهم إننا نختار الشريك بعناية وبالأخص إننا فاهمين إحنا في الفترة دي محتاجين إيه من شريكنا بالظبط.

• قدم السبت

كتير مننا بيكتئب في الشتا وبيزيد إحساسه بالوحدة، عشان كدا إحنا هنا، وبما إننا هنا فدا قرار نابع من جوانا إننا نحاول نقضي على المشاعر السلبية ونقضي وقت لطيف. مهم تبادروا وتساهموا شركائكم بالاقتراحات والخطوات عشان تقضوا وقت ممتع، اعملوا ليستة بالنشاطات اللي حاببين وجود شركائكم فيها ولازم تهتموا وتتواجدوا في الليستة بتاعتهم برضه.

• خلي بالك من مشاعرك

افتكر الاتفاق، خلي في بالك دايمًا الهدف اللي انتوا موجودين عشانه هنا، وحاول تفرمل مشاعرك لو قررت تحلم بخطوات أكبر، ممكن كمان تتناقشوا مع شركائكم في أفكاركم، يمكن يكونوا هما كمان مهتمين ياخدوا خطوة أكثر تطورًا في العلاقة دي، عموما مهم تعرفوا مشاعرهم وتشاركهم كل أفكاركم ومشاعركم أول بأول حتى وإن كانت اختلفت عن اتفاقكم.

• أنا مش دادة!

افتكروا إن شركائكم مش دكاترة نفسيين لكم ولا عشان متفقين على شكل علاقة معين إن دا يديكم حق تعاملوهم كأدوات ترفيه فقط. شركاؤكم بني آدمين برضه! وعندهم مشاعرهم واحتياجاتهم وحياتهم ونشاطاتهم واكتئابهم وفرحهم. ومهم تتبادلوا المهام معاهم ومتعاملهمش بس على إنهم لعبة للتسلية مربوطة بوقت. دا إحساس سئ ومهين شوية، تعالوا نحاول نكون طيبين مع نفسنا ومع شركائنا ومنحطش حد في الموقف دا.

• كلمني شكرا

التواصل ثم التواصل ثم التواصل، عادة مهم في العلاقات التواصل الدائم مع الشركاء والوضوح. التواصل بخصوص الأفكار والمشاعر والمخاوف وأي خطوات حابين تاخدوها وخلافه.

الكلام مهم، حتى لو كنتوا من الأشخاص اللي مش بيرتاحوا في الانفتاح الذاتي قدام ناس تانيين أو مش بتقدروا تعبروا عن نفسكوا أوي، مهم تحاولوا لأن دا غالبا الطريق الأسلم والأكثر أمان من الصمت والتعرض لتجربة ناتجها سئ بعدين.

بنتمنى لكم علاقات صحية وشتا دافي في صحبة شركائكم.