ملنيل ع الآخر
منصــــــــــة الكترونيـــــــــة تناقـــــــــش موضوعــــــات جيـــــل الملنــيل بنيــــــلة
١٠ نصايح لهندلة العلاقات اللي على مسافة بعيدة
هما بيسموها إيه!
خدت بالي دلوقتي إني عمري ما قريتها بالعربي.. “علاقة على مسافة بعيدة”؟
طبعا أنا لما بكون إنسانة واعية وبمثل صوت العقل كدور بطولة في وسط أصحابي، مستحيل أنصح بالنكد دا، ليه تربط مشاعرك من أول الخط لآخره بشخص إنتوا مش في نفس المكان، قرار مجنون فعلا وغير عقلاني أو منطقي على الإطلاق.
بس يعني أنا بقيت متفهمة أكتر.. إنه كسم الحب!
زمان وأنا صغيرة ومتحمسة كنت هصاحب حد عايش في مصر بس في محافظة تانية، بيننا ٣ ساعات بالعربية، وكان كول بالنسبة لي، يعني كنت بقول كإني رايحة مشوار للتجمع مثلا بمواصلات والدنيا واقفة فشخ.
دلوقتي وأنا كبيرة وهبلة، قررت أحب حد في بلد تانية خالص، بيننا ٣ ساعات برضه بس بالطيارة، وفيزا وترتيبات وقصص، بس حسيت إنه تمام عادي، دا كويس إنه مش هنا عشان ميشوفش المراجيح اللي أنا عايشه فيها..
بس يعني هي العلاقات المفروض متكونش كدا.. أنا اللي كنت بفكر غلط.
أنا كملنيل بنيلة أصيلة، اتربيت واتعلمت كل حاجة تقريبا بيوتيوب توتوريالز ومقالات نصايح، قررت أمارس هوايتي المفضلة.. الريسيرش!
تعالى يا جوجل إديني نصيحة.. أعمل إيه مع حبيبي البعيد عشان علاقتنا تفضل جميلة و متأججة بالمشاعر الدافية؟
وبلاد تشيلني وبلاد تحطني، ومن هنا لهناك، وبالتجربة، وبغض النظر عن مصير علاقتي لكني طلعت بمعلومات شايفة كتير منها قيم ومنطقي وينفع.
فقررت كالعادة إني مش هسيبكوا، يمكن يكون حظكوا وافر أكتر مني، وعشان برضه المجهود دا ميروحش هدر، قلت أكتب المجموعة المختارة من أذكى نصايح قابلتهم.. يمكن..
مبدئيا، الموضوع كله قايم على حاجتين مهمين، أولهم وأهمهم في رأيي هو التواصل.. إمتى وإزاي؟
- تليفون صغير منك طمنني عليك.
التواصل دايما مهم، حاسين بإيه دلوقتي؟ بشكل عام وتجاه الوضع دا؟ هل محتاجين حاجة تتغير ولا مرتاحين كدا؟ طب ولو هتغيروا حاجة هتكون إيه؟ هنفتح علاقتنا مثلا؟ هنشوف ناس تانيين بدون ما يكون عندنا مشاعر تجاههم؟ ولا هنفضل ملتزمين تجاه بعض؟
احتياجكم للتواصل ممكن يكون طريقته ووقته المناسبين متبادلين.. هايل.. هاي فايف وهنيئا لكم!
وممكن يكون احتياجكم مختلف، فمحتاجين تتناقشوا عن احتياكم للتواصل وتوصلوا لطرق مرضية لكل أطراف العلاقة.
أوقات فرق التوقيت ونوع الشغل بيصعب التواصل، بس احنا اتقفنا اننا هنبذل مجهود زيادة شوية. اتكلموا كل يوم، حتى لو كام تيكست ع السريع تطمنوا على بعض. شاركوا بعض تفاصيل يومكم، مشكلة حصلت في الشغل، حاجة جديدة اشتريتها، كتاب قريته، حد اتعرفت عليه، ورشة مفيدة حضرتها. من خلال التواصل الحقيقي، هتقدر تخلي الشريك يحس إنه متشاف ومفهوم ومش وحيد.
- من خمسة لخمسة ونص!
حطوا بعض في الكالندر، عادة أنا بخاف م الحاجات الدورية، عشان بناخدها كأمر مفروغ منه ومعاتاد عليه وبنزهق منها مع الوقت وبتسهل إننا نعتذر عنها لأسباب ومشغوليات تانية.
بس هنا إحنا أذكياء ومش هنعمل كدا، هنلتزم بلقاءاتنا المحددة الدورية، هنخليها ودودة ولطيفة كل مرة وهنعمل مجهود عشان نحقق دا.
مبدئيا محتاجين تعرفوا جدول بعض، بتناموا امتى وتصحوا امتى؟ مواعيد الشغل؟ كورسات؟ ورش؟ مواعيد دكتور؟ وخلافه.
- مهو أصل يا عطا الشوق أخد وعطا
لا مكان للعلوقية في العلاقات دي، مجهود وشغل وطاقة، وندخل مرحلة الابتكار بقى، خدوا بعض ديتس برا البيت، وفرجوا بعض على أماكن مختلفة في المكان اللي هما مش فيه.. ألعبوا.. شاركوا كابل تاني من صحابكم واعملوا دابل ديت.
احتفلوا بأعياد ميلاد بعض بطرق مبتكرة، لو حد منكم راح مكان جديد لذيذ ممكن ياخد شريكة فيديو كول ديت في المكان دا، يعمله جولة بالكاميرا يوريله المكان ويقعد معاه ويطلب قدامه ويتشاركوا التجربة حتى ولو عن بعد.
اطبخوا سوا، اتشاركوا وصفات من البلدان اللي انتوا فيها.. حتى الكشري بيتعمل مختلف بين القاهرة واسكندرية!
خليكوا فاعلين ومؤثرين في حياة بعض حتى لو كنتوا بعيد، ادخلوا نقاشات عميقة، اتكلموا عن إيماناتكم، شاركوا بعض تخوفاتكم وأفكاركم وأحلامكم، احكوا ذكرياتكم القديمة، واعملوا خطط سوا.
ماتنسوش.. المفاجأت حلوة برضه.
- مش سامعك من الدي جي!
أهلا وسهلا يا فندم، مشاكل تقنية، إديني! إنترنت وحش، النور بيقطع، السماعة باظت، الموبايل اتزحلق مني والشاشة اتكسرت.. حصل وبيحصل وهيحصل.
بس تعالوا نفكر ازاي ممكن نطوع السوشيال ميديا لصالحنا، ودا عالم كبير أوي ينفع يسهل العلاقات البعيدة دي. اظهروا لبعض على كل الابلكيشنز، صور على انستجرام، ميمز على فيسبوك، ستيكرات على واتساب، الڤويسنوتس تداوي الجراح وتشفي القلوب والله لو بتحبوا بعض بجد.
- أنا مش أنانية!
معظمنا انسكيور من حاجة واحدة على الأقل، النقاش والوضوح والتفهم والتراحم بيحل المشاكل دي، الغيرة صعبة لوحدها وهتكون أكتر مرارة في العلاقات اللي عن بعد لأننا مش قادرين نؤكد أو ننفى أي أفكار بتيجي على بالنا.
فمع ظهور مشاكل الثقة، التواصل والصراحة مهمين، مهم نتكلم ونهدي بعض، تعالوا كمان نقلل سرعة الأحكام ونستنى لما نتكلم الأول، شاركوا بعض مشاعركم ودخلوا شركاؤكم أكثر في حياتكم، دا عامل مهم وهيفرق كتير في الرحلة دي.
- كله يا وليد!
السكستينج بيكون لذيذ، أنا معرفش علاقتكم إيه مجتمعيا، أقصد يعني متجوزين مثلا فمجتمعنا هيديكوا الأوكيه ولا مش متجوزين فدي تبقى نجاسة، ولو إن الحقيقة بنشوف شركاء كانوا متجوزين وبنلاقي الرجالة بيسربوا صور زوجاتهم وأحيانا فيديوز كمان متصورة بدون علمهم وبنلاقي الناس ع السوشيال ميديا بيقولوا “إزاي ست محترمة تعمل كدا مع جوزها!”..
بس يعني بغض النظر، أو مش بغض النظر طبعا، الحقيقة أنا عادة مش بنصح بالسكستنج ولا تبادل النودز مش بس للأسباب السابقة من مجتمع غادر أو احتمالية غدر من الشريك، لكن عشان أصلا أنا مصدقة إن محدش فينا محمي رقميا، محتمل موبايلي يكون متهاك بشكل ما لما وديته لأحدهم يصلح لي فيه حاجة، محتمل بشكل أكبر إن كل الابلكيشنز اللي بنوزع عليهم الأذونات وسامعيننا وقاعدين معانا، فيعني أنا عن نفسي مباخدش أي صورة حتى لنفسي للأسباب دول، قبل التفكير في احتمالات غدر الشريك والمجتمع.
بس عادي.. أنا غالبا مجنونة ويمكن أكون عندي ارتياب زايد.. ملناش دعوة بيا.
رجوعا، السكستنج شعوره لذيذ، أوقات بيكون مفيد فعلا وبيخلينا نحس للحظات إن الشريك حوالينا حالا، بكام سطر بيقولوا الشريك دا عارفنا قد إيه، حافظ أجسامنا، وفاكر بنحب إيه وبنتبسط إزاي. وساعات بيكون مساحة للاكتشاف والتجربة، وبيحمس أكتر للقاء لتنفيذ كل الخطط اللي اتبسطنا وإحنا بنتكلم عنهم دول.
- فن اختيار الهدايا عن بعد..
كله بيوصل لكل حتة، ممكن نشتري هدية ونشحنها للبيت أو الشغل عند الشريك، ابعتوا لبعض بمناسبة وبدون مناسبة رسايل جميلة وكروت هدايا. ممكن تتشاركوا في هدايا اونلاين، زي ان حد منكم يعمل بلاليست مزيكا للتاني، أو تشتركوا في أكاونت لمنصة من منصات المحتوى عشان تقدروا من خلالها تعملوا موڤي نايتس.
- وحيد يا ليل!
هنحس بالوحدة وكل المحاولات دول في وقت ما مش هيكون كفاية.. وماله!
مهم نخلي نفسنا مشغولين بالشغل أو بنشاطات زي الهوايات أو الخروج مع صحابنا أو التواصل مع أهلنا، كل دا وما يشبهة بيفرق كتير في إنه يعدي الأوقات الصعبة دول، وأوقات بيخلصنا من شوية مشاعر الاحباط اللي بيكونوا ملازمين للوقت دا. ولما تتكلموا المرة الجاية احكوا لبعض عن الوقت الصعب دا وعن مشاعركم ومخاوفكم، اتخانقوا.. الخناق صحي لو قايم بشكل سليم ومراعي لأطراف العلاقة. والاهتمام بيتطلب عادي والله، إحنا كبار كفاية وعرفنا دا بالطريقة الصعبة، يالا ننفذه بقى.
- فين الديدلاين؟
يعني هو الهدف من العلاقة إننا نكون سوا.. فالوضع دا هيستمر لحد إمتى؟
ولو مش هيكون في احتمالية قريبة للتجمع في مكان واحد فلازم تتفقوا على مواعيد زيارات ثابتة، المفروض إن دا وضع مؤقت بنشوف سوا إزاي هنتعايش معاه، مش لايف ستايل، مهم جدا تتواصلوا بخصوص القصة دي، إنكار الكلام عنها بيعمل إحباط مدفون بيتقل كل اللي بيحصل بينكوا مع الوقت.
- اوعى الريد فلاجز!
كام نقطة ع السريع، خلوا بالكم من نفسكوا لو لاحظتوا انهم بيحصلوا في علاقتكم مع شركاؤكم.
لو لقيت إنك بتحط مجهود أكبر من الشخص التاني؛ لو لقيت الشريك مبقاش مهتم بلقاءاتهم أو بكلامكم.. أو بينسى حاجات واضحة اتكلمتوا عنها ومبقاش مركز أوي؛ لو بقيت حاسس إنك مش موجود في حياة الشريك..
يبقى جه وقت انكوا تتكلموا خمسة جد، يا الحاجات تتصلح وتختبروا دا لمدة مش قليلة وبطرق مختلفة، إما تخرجوا بالمعروف والود وتبقوا أصحاب أحسن.
تاني عامل مهم هو الأمل أو بالأحرى الآمال المشتركة.
خبراتنا أثبتت إن الحب لا يصنع المعجزات، الحب للأسف ساعات بيكون عقبة كبيرة، لذلك الوعي بنفسنا وباللي بنعيشه وبمشاعرنا بشكل دوري وواقعي مهم جدا، الإحساس بالأمان مهم وإنك متشغلش بالك والمركب تمشي لوحدها بسلام دا شئ جميل ومريح، لكن العلاقات اللي من النوع دا بتكون مليانة تحديات ومحتاجة شغل دايم عشان تفضل وتكمل، هل إحنا لسه مناسبين لبعض؟ هل لسه بيننا نفس الأرضيات المشتركة؟ نفس الاهتمامات؟ نفس القيم والمبادئ؟ نفس الخطط المشتركة؟ التواصل بيننا أخباره إيه؟
الحب عادة للأسف بيكون خارج عن إدارتنا، ولحظنا العاثر ممكن نقع في حب شريك ويكون فعلا هو دا الشخص المناسب ويكون الشخص دا في قارة تانية!
هتعدي أوقات نحس فيها بأقصى درجات الإحباط المر، هنخبط دماغنا في الحيط ومفيش حاجة هتتغير، لكن لو جوانا حتة عارفه إن دا وضع مؤقت يمكن دا يهون شوية ولو صغيرين.
يعني أكيد السبب هيعدي، الدراسة هتخلص أو الشغلانة هتتنقل لمكان تاني وما شابه، لذلك الخطة المشتركة مهمة تفاديا لوجع القلب وتضيع الوقت.
الأمل هيساعدنا نتجاوز الأوقات دول، هيخلينا كمان نحاول نستفيد بأقصى قدر ممكن من الوضع دا باعتباره تحدي مؤقت وفرصة بنثبت بيها لبعض إننا بنحب بعض ومتمسكين ببعض.
تجربتي فهمتني إن الموضوع مناسب لناس ومش مناسب لناس تانيين، أنا مثلا مش بيج فان بالتواصل.. أو هكذا كنت اعتقد قبل القصة دي، فيعني التجربة بتعلم وبتعرفنا كتير عن الآخر وعن نفسنا.. المهم نخلي بالنا منعلمش على حد غيرنا وإحنا بنجرب. وبتمنى لكم حياة مريحة وهادية مليانة حب ودفا.
