ملنيل ع الآخر

الردادة فتحوا محادثة عن الحادثة، وطربوش الباشا مع الخلخال في الاطوموبيل.

هشك بشك.. خمارة وكونياك، وفستان هز الطريق بمبالغة وتبريق.

غزال بشنب عامل نمرة، مليح سمبتيك ع المسرح، والاسطى بيوجه الأرتيست.

الملك والباشا والإقطاع بلامنت، أفندي ببدلة رقص، اتكحل وبكل خلاعة دخل في خناقة، المطيباتي بخفة ورزانة ملك الساحة، وثبات الباشا مليح.

غازية درجة تانية قاعدة مع الفتوة بدلاعة، وصوت الراديو والصورة في المراية حكاية.

الفتوة صاحب الوجاهة.. اتهز في الطريق.. رفع الكونياك وطلع ع المسرح وقال: كله تمثيل في تمثيل!

-المجموعة

سعيدة.. 

سيداتي انساتي بدلة رقص لفت على أشهر رقاصات كازينو بديعة 

كانت تميمة الحظ للكل وجايز لعنة أول واحدة امتلكتها

رقاصة ورا رقاصة لبستها

 ماتعرفش السر في البدلة ولا في حكايتها..

رقاصة أبهه دي كان ليها شخصية ونمرة بيتحكي عنها من اسكندرية للقاهرة.. لدرجة ان اعظم اسم في الكار أياميها خدتها معاها القاهرة وكبرتها لحد ما قررت تفتح لها صالة مع صاحبتها يتحاكوا الناس عليها..

بس على رأي المثل: “جبت الأقرع يونسني.. قلع الطاقية وخوفني”

فتوة نطع واكل شارب ببلاش وكمان عايز الإتاوة..

رقاصتنا.. إمتثال.. إمتثال فوزي.. تقف في وشه وتقوله ماكنش ينعز! 

وفي الصالة عندي مالكش مكان!

ورايح جاي لحد ما وصلنا للتهديد بالقتل..

راحت وقعت في عرض الباش شاويش لكن محدش خد كلامها جد

لحد ما حصل اللي حصل

يادوب فات ساعتين على خروجها من عند البهوات، لقت صبي من صبيان الفتوة إياه متربص لها وفي ايده ازازة مكسورة 

وفي ثانية رقبة الازازة بقت في رقبتها

قامت الدنيا ما قعدتش.. وأخبار إمتثال غرقت كل جرانين ومجلات المحروسة بس للاسف مش عشان فنها! 

اللي حصل هز الدنيا.. 

لدرجة أن أكبر مجلة أياميها عملت حملة كبيرة ضد الفتوات وبلطجتهم..

ومن غباوتهم كرروها على طول مع “عيوشة”

الرقاصة التانية اللي شافت نفس مصير إمتثال لما قالت لأ زيها

وكانت القاضية..

“بيان لأهل المملكة المصرية: إلغاء نظام الفتوات بصورة نهائية” 

عشان مايصحش النبوت يكون بدل القانون محطوط

ممنون لاستماعكم يا سادة.. 

انبسطوا بنمرة الليلة دي عشان ملهاش إعادة 

ميرسي

-أيوب ومروة

جبتها في يناير ٢٠٢٠، شهرين قبل الكورونا..

كنت مسافرة أسوان مع صديقي، وقلت إنها سوفونير حلوة من هناك. 

من ساعتها حطاها في ميموري بوكس وماستخدمتهاش، بس مبسوطة إنها عندي

بتفكرني بحفلات الزار.

-أميرة

طلعتني من فترة كانت سودا أوي. كنت فاكر إني بعيش أجمل أيامي بس فوقت واكتشفت إن كل الحاجات اللي كنت فاكرها بتحيني كانت في الحقيقة بتموتني. كنت ميت او شبه ميت؛ كل الحاجات اللي كانت بتقربني للحياة مبقاش فيا طاقة حتى افكر فيها.

لحد ما قررت اهد كل اللي بنيته في أيامي وابني بيها لنفسي شيء جديد. 

-عمران

عندنا في الأفراح الراجل والست زي بعض.. كله بيرقص.

الإيقاع ثابت ويمكن صوته ممل.. بس بعد فترة بتاخد عليه وجسمك يتحرك لوحده.

بنقف صفين أو تلاتة.. وبيكون في ست واحدة أو اتنين أو تلاتة.

أول ما شفت الرقصة اندهشت وكإني بشوف فيلم، الطاقة رهيبة وكله بيتحرك.

الموضوع عامل زي اللوحة كل ما تشوفها أكتر تلاحظ تفاصيلها أكتر.

التناغم.. والدلع في رقصة البنات.

ولما بتعجب الرجالة بنت أو رقصها يعني.. بيرقصوا في دايرة حواليها.

-حسن

هي أنوثتي و تاريخي هي تمرد أختي المراهقة ودفا ملوخية جدتي وانتمائي لكل إمرأة بينهم على حدا.

كل ما استفز حنيتي وثورتي.

كانت معايا في أول مرة مايوه التمرين مبقاش يغطي كفاية وأول مرة كلامي عن الأفلام مبقاش مُبهر لعمر اللي قاعد جنبي في الفصل.

هي ممشيتش فضلت معايا.. بنعكس بعض زي المرايا.

-لُچين

جبتها على آخر لحظة

كنت متخيلة إنها هتخلي الناس ماتبصليش كتير..

لكن الحقيقة من ساعة ما جبتها وهي عامله قلق..

برغم إنها مش أحلى واحدة يعني لكنها فيها حاجة حلوة.. حاجة حلوة بيننا..

أنا قلت أهي حاجة تؤدي الغرض لكنها بقت راشقة في أي حكاية وحضورها اتفرض..

لدرجة إن مديرتي استلفتها مرة عشان تلعب بيها لعبة بيلعبوها برا

بصراحة بصراحة مش فاكره إيه تاني يزود الوضاحة.

-مروة

في صحرا ومعييش غيرك، وصلة بيني وبين روحي، وصلة بيني وبين الغير منطوق مني.

في صحرا وليه إنتي بس، سؤال في صحرا ومعكييش غير حاجة واحدة بتكوني إنتي الإجابة.

ليه إنتي؟ 

مش هدور على كلمات لإجابة.

إنتي مُحمسة وطعمك حلو أيًا كانت الحالة إيه، ببساطة.. أنا بحبك وهسكت دلوقتي.

-نهى

من أكثر الهوايات المفضلة عندي زمان إني أجمعهم، دايماً لما كنت أروح عند جدتي كنت أخد منها واحدة أو اتنين من غير ما تعرف، كنت بحب ألوانهم، مش بعيد اكون بقيت فنان بسبب الهواية دي، عدت سنين والتدوير وراها مبقاش يفرق معايا اوي، لحد ما جبهالي اقرب اصحابي كهدية  وهو عارف إني كنت مستنيها خصوصًا إنها من شغله، رجعتلي هوايتي القديمة.. 

ادور على الألوان في عيون جدتي.. 

“صُبحية” ده إسمها في مرة سألتها، بتحبي الألوان ليه يا نينة؟ قالتلي: علشان بديعة والورد زايد لون الورد ناقص لون والليمون فرفشة بيقلب الامثال، النور يحب الضلة والضلة بتحب النور وفيه بيناتهم عذول، مش عارفه يبقي مين، ولا اسمه إيه النهاردة، كان اسمه إيه إمبارح، عذول لأجل العجب..

-أيوب

اشتريته وأنا في خان الخليلي 

ما بين الواقع و الخيال

شبهه و مش شبهه

حسسني اني قريبة وبعيدة في نفس الوقت.. لماضيه وأم جدي 

كان نفسي فيه من زمان 

حسيت اني مليش حق أو مبرر أجيبه

هستخدمه فين؟ وإزاي ؟

لكن مع ذلك 

ايقنت ان ممكن اتنكر وافتخر

 فاعيش واقعي وحياتي وكل ما فيها من خيال 

-حبيبة

 

الخميس ٨ يونيو ٢٠٢٣، في مركز الصورة المعاصرة بالقاهرة تم عرض العرض الأدائي وإطلاق المطبوعة التي تحتوي على تلك النصوص والرسوم.

//نمرة الليلة: عرض أدائي ومطبوعة//

نتاج معمل النصوص المتحركة: نسخة كازينو بديعة، اللى خلال جلساته السبع إشتغلنا على تجربة كتابة نصوص وحركات أدائية طورناها واحنا بنتناقش وبنتفرج على أفلام وفيديوهات. التيمة العامة كانت الهوية وفورة الچندر ورجعنا بالزمن للتلاتينات، تحديدًا في القاهرة جوا كازينو بديعة. حاولنا نجرب ندمج أكثر من أسلوب لتوليد النصوص والحركات وطلعنا بعرض أدائي ومطبوعة «نمرة الليلة». 

بمشاركة كل من أميرة الجوهري، أيوب سعيد، حبيبة حمدي، حسن عبد الحليم،عمر عمران، لُچين ، مروة دياب، نهى سراج الدين.