ملنيل ع الآخر

كتابة: محمد عبد الله سامي

رسوم: مخلوف

من فترة طويلة رحت نادي نقابة المهندسين اللي في الزمالك عشان أشتغل شوية، مكان لطيف وهادي ومناسب للشغل، بس بالصدفة السخيفة كنت لابس شورت مش بنطلون. ماركزتش في التفصيلة دي إلا لما الراجل على البوابة بص على ركبي وقال لي “ممنوع”، بصيت أنا كمان على ركبي وقلت له “هو إيه؟”، قال لي “الشورتات يا باشمهندس”، قلت له “ليه؟”، رد بثقة “تعليمات الأمن”، رديت باستهزاء “ده نادي!!”، رفع كتافه وابتسم بإنه مفيش حاجة في إيده، قلت له باستعطاف “يعني أروّح؟” تردد لثواني “العفو يا فندم.. بس ممكن حضرتك تلبس بنطلون وتيجي”.

أنهيت الحوار في اللحظة دي قبل الراجل ما يتدخل في دولابي أكتر من كده، ولفيت ومشيت. وأنا نازل على سلالم البوابة وخارج، جالي هاتف من السما زي اللي بيجيلك فتلغي كل المشاوير اللي وراك وتفرغ نفسك لموضوع تافه، الهاتف قال لي “انت كده شكلك عرة قوي على فكرة”. وقفت، وطلعت سلالم البوابة مرة تانية لحد الراجل وقلت له “ليه بقى الأمن منع الشورتات؟”، قال لي “ماعنديش فكرة والله يا فندم”، وراح مشاور على ورقة متعلقة جنبه مكتوب عليها القرار. فرديت بثقة لا تتناسب مع شاب بشورت “عايز أكلم حد من الإدارة”. قال لي “ممكن حضرتك تكلم مدير الأمن” وراح مشاور على مكتب جوا النادي مش بعيد كتير عن البوابة وعليه شمسية كبيرة، وتحتيها راجل كبير محترم ببدلة وحواليه مجموعة من الحلل والصواني والطواجن اللي اكتشفت بعد كده انها بردو ممنوعة من دخول النادي زيي بالظبط، بتعليمات من الإدارة.

دخلت على مدير الأمن، قلت بنفس الثقة “إيه حكاية الشورتات دي حضرتك؟”، رد بزهق “اللايحة اتعدلت في اخر جمعية عمومية يا باشمهندس!” قلت له “ايوة يعني الموضوع ليه علاقة بالعورة.. يعني لو لبست شورت تحت الركبة ممكن ادخل؟” قال “اه ممكن يا فندم”. حسيت الفرصة جت لي ورحت صعدت طبقة الحوار “يعني الموضوع له علاقة بالعورة من السرة للركبة.. طب أنا مسيحي.. هل لازم أغطي العورة زي المسلمين؟”. الراجل لو كان بص ثانية في اسمي في الكارنيه كان هيفهم اني بكدب عليه، بس كعادة كل المسئولين أول ما بتيجي سيرة المسلمين والمسيحيين، اتخض واتبرجل وقام من على مكتبه واتغير الزهق لاهتمام ونبرة كلامة بقت ألطف “لا يا فندم.. هاها.. ايه ده.. ازاي تقول كده حضرتك.. يا نهار أبيض.. هاها.. انت فهمت غلط خالص.. اتفضل بس معايا وانا هشرح لك”. 

ابتديت أتمشى أنا وهو جوا النادي، اللي ممنوع فيه الشورت، وانا لابس الشورت. وبدأ الراجل يحكي…

“الصيف اللي فات.. حصلت واقعة في التراس وكانت هي السبب.. واحد من الأعضاء كبار السن كان قاعد في التراس.. وكان لابس شورت بس واسع شوية.. وواضح إنه خد راحته شويتين او راح في النوم او حاجة ومن غير ما يقصد ولا مؤاخذة في اللفظ يعني يا باشمهندس ففي عضو من جسمه خرج من رجل الشورت وظهر للعيان.. ولسوء الحظ شافته واحدة من السيدات اللي قاعدين في التراس وراحت مصوتة وندهت لفرد الأمن وتم التعامل مع العضو فورًا.. بس الست ماسكتتش وقامت مقدمة مذكرة لمدير النادي عشان يتقدم بطلب للجمعية العمومية عشان يمنعوا الشورتات من دخول النادي.. ومرفق مع الطلب ورقة موقعة من اكتر من عشرين عضو مدون فيها واقعة عضو العضو.. والطلب اتناقش في الجمعية العمومية واتوافق عليه.. بس هي دي كل الحكاية.. حضرتك لو معترض ممكن تدخل لمدير النادي وتتفاهم معاه”.. 

الحكاية طلعت أقوى بكتير من إني أسيبها في نصها من غير ما تخلص، ولازم أكملها، فقلت له طب دخلني للمدير. المدير راجل سبعيني لذيذ قوي لابس بنطلون ابيض وقميص هاواي، دخلنا عليه وسألته نفس السؤال، فضحك جدا وقال لي “الموضوع كله عشوائي وأنا كل ما بفتكره بضحك، ومتفهم جدا اعتراضك ومفيش في ايدي ولا ايدك حاجة نعملها غير إنك تكتب مذكرة تطلب فيها إلغاء القرار وأنا هقدمها لك..”

وضحك وقال لي وهو سايبني اكتب المذكرة في مكتبه وخارج “بس عشان الموضوع يتاخد في الحسبان يعني ماتنساش تكتب فيها (مذكرة ردا على مذكرة “عضو العضو”)”

من اسبوعين رحت النادي اعمل حاجات وافتكرت المذكرة وسألت فعرفت انها اترفضت… وانتصرت باقي الأعضاء.