ملنيل ع الآخر

كتابة: محمد عبد الله سامي 

رسوم: مخلوف

عارف.. أنا لما بخرب وأغيبب.. بعرف الحل.. والأرض بتكلمني وتوصلني لسبب مقنع من وجودنا.. وبفهم أسرار الكون والغيب.. وساعتها ببقى قادر أحل كل مشاكل الناس.. وأفشي السلام في العالم.. وأجاوب على كل المعضلات.. وأفحم كل العلماء.. وأحاجج كل الفقهاء.. وأعرف أوجد البرهان على منطقية الميتافيزيقا والما وراء فيصبح مش  ما وراء ولا حاجة.

بس بكسّل… 

لسه هكلم كل واحد وأقنعه إن أنا الخضر ومصلحته معايا وحله عندي.. لا فاكس.. مش هطير الدماغ عليهم.. والمشكلة إني لما بفوق بنسى.. وأقابل الناس وأتسحل معاهم وأبقى عايز أساعدهم بس مش فاكر الحل.. مع إنه كان لسه معايا امبارح.. وأعصر دمااااغي… مفيش.. بس خلاص خلاص.. أنا هخرب بالليل وأعرف الحلول وأكتبها في ورقة.. وبكرة الصبح هقولها لكم.

آجي بالليل.. أوضب المسائل.. وأخرب.. وأكلم الأرض.. وأجيب ورقة وقلم.. وهي تمليني وأنا أكتب لحد ما أحل كل مشاكل الكوكب تمًّا.. وأصحى الصبح أبص في الورقة مافهمش ولا كلمة.. ماعرفش بقى أنا اللي مابعرفش أكتب وأنا خربان.. ولا أنا اللي مابعرفش أقرا وأنا فايق.. ولا أصلًا الأرض هي اللي بتمليني غلط بالقصد عشان ماحدش يعرف غيري.

فأنا فكرت فيك إنت عشان انت مابتضربش.. وفي نفس الوقت عندك نفس الدماغ وهتفهمني.. تقعد معايا بقى لحد الفجر.. أنا أضرب وأنت تكتب اللي أنا بقوله.. والصبح نشوف.. يمكن نعرف نطلع الكلام ونقوله للناس.. عسى أن يكون لهم في أنفسنا من شيء.. والدنيا تبقى حلاوة.

بس الغريب يا أخي.. إن الأرض عمرها ما قالتلي حل مشكلتي أنا.